Xog Lahelay: Falaagada Al Shabaab Oo Qorsheenaya Inay Qaraxyo Ka Geestaan Magaalooyinka Garoowe Iyo Hargeysa.

Xog Lahelay (AGGM): Warar rasmi ah oo kusoo dhacay shabakada Allgalgaduud Media ayaa waxa ay xaqiijinayaan in Falaagada Al Shabaab ay hoosta ka xariiqeen qorshe weeraro looga fulinayo magaalooyinka Garoowe iyo Hargeysa ee xarumaha maamulada Puntland Iyo Somaliland.

Warkan ayaa sheegaya in falaagada argagixisada ah ee Al Shabaab ay diyaariyeen ilaa 20 ruux oo loogu talagalay inay fuliyan weerarada waxaana ragaan ay markoodi hore lagu soo diyaariyay buuroleyda Galgala.

20-kan naftood haligeyaasha ah ayaa hada waxa ay soo gaareen magaalooyinka Garoowe iyo Hargeysa waxaana xogtu intaa ku dareysaa in ilaa 4 Xarumood ay la damacsan yihiin weeraradan oo aan la carabaabin.

Warkan sida hoose looga helay saraakiil sare oo katirsan sirdoonka maamulada Somaliland iyo Puntland oo ka gaabsaday magacyadooda ayaa waxa ay xaqiijiyeen in xarumo qarsoodi ah ay Al Shabaab kuleeyihiin magaalooyinka Garoowe iyo Hargeysa, islamarkaana ay ku dhamaystiran yihiin adeegyada loogu talagalay weerarada si aad ahna sirdoonka labada maammul ay ulla socdaan dhaq dhaqaaqa xarumahaas.

Falaagada argagixisada ah ee Al Shabaab ayaa Saraakiil katirsan ururkooda oo ku xeel dheer qaraxyada waxa ay keeneen magaalooyinka Garoowe iyo Hargeysa si aan qorshahooda u dhicisoobin.

Xogtan sida hoose lagu helay xili Falaagada Al Shabaab ay shaaciyeen in deegaanada Puntland iyo Somaliland weeraro ka fulin doonaan hase yeeshe xogta lahelay kuma ay cada goobaha bartilmaameedka u ah.

Maamulka Puntland iyo Beesha Caalamka ayaa  waayahaan danbe waxa  ay marwaliba  walaac ka muujinayeen soo galintaanka falaagada Al shabaab  ee sida  xowliga ah  ugu soo  qul qulayay buuraha  Galgala.

Falaagada Al Shabaab  ayaa  horay  qaraxyo ugagaystay  magaalooyinka Boosaaso  iyo Hargeysa oo ay ka kala arimiyaan maamulada Puntland  iyo Somaliland kuwaas  oo naftooda  ay ku  waayeen Wasiiro iyo xildhibaano iyo taliyeyaal ciidan.

Isku soo wada duub oo dowladdaha Ingiriiska  iyo Ierland ayaa waxa ay todobaadki tagay ugu baaqeen muwadinniinta kasoo jeeda dalalkooda amaba dalalka reer Galbeedka ah inay isaga soo baxaan deegaanada Maamulka Somaliland, taa oo xaqiijinaysa dhaq dhaqaaqa ay ka wadaan Falaagada Al shabaab  deegaanada Puntland iyo Somaliland, falaagada Al Shabaab oo ah musiibo ka  soo  if  baxay  geeska  africa  iyaga  oo wakiil u ah ururka aragagixisada caalamiga ah ee Al Qaacida.

Isha Ku Hay Allgalgaduud Media
allgalgaduud@gmail.com